udasi khatm ho jae agar tum milne aa jao
mera har zakhm so jae agar tum milne aa jao

shab-e-hijran ke mathe par sawere phir se raushan hon
ye rut gajre piro jae agar tum milne aa jao

tumhaare qurb ke lamhe mayassar hum ko aa jaen
ye dil rangon mein kho jae agar tum milne aa jao

sitara bakht ka apna bulandi par nazar aae
zamin aakash ho jae agar tum milne aa jao

hawaon mein basi phulon ki dil-awez ye khushbu
mere dil mein samo jae agar tum milne aa jao

kadakti dhup hai sar par bhala inkar ye kab hai
mujhe sawan bhigo jae agar tum milne aa jao