umr gai ulfat-e-zar ji se ilahi na gai
mu safed ho gae par dil ki siyasi na gai

ji mein thana tha ki hum hijr mein jine ke nahin
mar gae aah ye baat hum se nibahi na gai

umr gai hijr mein dil karta hai mazkur-e-visal
baat ab tak yahi diwane ki wahi na gai

ji gawara nahin karta ki karun minnat-e-khalq
ho gae garche gada dil se wo shahi na gai

dukhtar-e-raz se faqat mein nahin mahfuz 'huzur'
kaun majlis hai ki jis mein ye sarahi na gai