uthte hain qadam tez hawa hai mere pichhe
lagta hai koi qafila sa hai mere pichhe

jis bazm mein jata hun mujhe milti hai izzat
wo yun ki meri man ki dua hai mere pichhe

be-manzil-e-maqsud main ghaltan hun safar mein
afsos zamane tu chala hai mere pichhe

mudna hai mujhe mod mohabbat ke nagar ko
ganw ki mere aab-o-hawa hai mere pichhe

ye dhup hai jo sar ko mere dhanp rahi hai
ye saya mera hai ki chhupa hai mere pichhe

kahta hai mujhe aap se aage nahin chalna
us taur zamana ye pada hai mere pichhe