wafa ka shauq ye kis intiha mein le aaya
kuchh aur dagh main apni qaba mein le aaya

mere mizaj mere hausle ki baat na kar
main khud charagh jala kar hawa mein le aaya

dhanak libas ghata zulf dhup dhup badan
tumhaara milna mujhe kis faza mein le aaya

wo ek ashk jise raegan samajhte the
qubuliyat ka sharaf wo dua mein le aaya

falak ko chhod ke hum dar-ba-dar na the 'shahbaz'
zamin se tutna hum ko khala mein le aaya