yahan ho rahin hain wahan ho rahin hain
nihan thin jo baaten ayan ho rahin hain

irade hamare duaen tumhaari
hawaen hi khud baadban ho rahin hain

lutai kisi ne jawani watan pe
dishaen bhi shahnaiyan ho rahin hain

kai aasman aa gire hain zamin par
zaminen kai aasman ho rahin hain

raqibon talak kaise pahunchi wo baaten
jo tere mere darmiyan ho rahin hain

koi phul dewi ke charnon tak aaya
kahin muntashir pattiyan ho rahin hain