zahe-koshish-e-kaamyab-e-mohabbat
hamesha rahe hum kharab-e-mohabbat

sukun-e-mohabbat jo mumkin nahin hai
badha dijiye iztirab-e-mohabbat

jhuki ja rahi hain wo masum nazren
diya ja raha hai jawab-e-mohabbat

bila-wasta hum se aankhen milao
rahe darmiyan kyun hijab-e-mohabbat

teri bazm jannat thi lekin karun kya
utha le gaya iztirab-e-mohabbat

na tarsa na tarsa mohabbat ke saqi
pila de pila de sharab-e-mohabbat

hue hain wo jis din se naraaz 'sheri'
taraqqi pe hai iztirab-e-mohabbat