zamin ne un ko sambhaala jo aasman se gire
kahan hai un ka sahaara jo khak-dan se gire

jo mutmain hain bulandi pe nakhl-e-khurma ki
us aasman ko dekhen kabhi jahan se gire

ab us ko dekh ke hi dil ko khauf aata hai
buland-baam the hum kis qadar kahan se gire

shikasta sang bade aastan ke waris hain
ki tha maqam-e-mualla ye but jahan se gire

jinhen nasib ne di eqtidar ki masnad
unhen hai zoam the na-ahl jo yahan se gire