zindagi khwab-e-hasin ka nam hai
ya koi khush-rang khali jam hai

zindagi ka kya hasin anjam hai
dil mein teri yaad lab par nam hai

hans liya tha lahje par hum ne kabhi
umr bhar ab aansoon se kaam hai

mast hai jis ne bhi dekha ek bar
chashm-e-mai-gun wo chhalakta jam hai

ye shikayat aur ye aah-o-fughan
tera dawa-e-mohabbat kham hai

jis ne pai ek bhi teri jhalak
wo sada khamosh hai gumnam hai

ruh par ek kaif ban kar chha gai
yaad se mahki hui jo sham hai

pyar ki teri nazar ya qahr ki
aur kya ye gardish-e-ayyam hai

ja-ba-ja hum khud bhatakte hi phire
warna us ke dar pe faiz-e-am hai

subh dekhi hai 'habib' aur dopahar
aai ab to zindagi ki sham hai