zindagi tujh pe ab ilzam koi kya rakkhe

zindagi tujh pe ab ilzam koi kya rakkhe
apna ehsas hi aisa hai jo tanha rakkhe
kin shikaston ke shab-o-roz se guzra hoga
wo musawwir jo har ek naqsh adhura rakkhe
khushk mitti hi ne jab panw jamane na diye
bahte dariya se phir ummid koi kya rakkhe
aa gham-e-dost usi mod pe ho jaun juda
jo mujhe mera hi rahne de na tera rakkhe
aarzuon ke bahut khwab to dekho ho 'wasim'
jaane kis haal mein be-dard zamana rakkhe