mere yar
tera mera ek hi rasta hai

ki palkon se sahra ba-sahra chamakdar zarraat chun kar
sharabor mutthi mein mahfuz karte rahen

aur sar-e-sham
phaila ke in ko hatheli pe dekhen

ki aaya koi reza-e-zar bhi hasil hua ya nahin
kitab-e-muqaddar bhi naqsh-e-izafa na utre

to batn-e-tafakkur ko ummid ke nan-e-shirin se bhar kar
shagufta shuaon mein sar ko jhukae

usi apni mansub rah pe nikal jaen
palkon se zarraat chunne ki khatir

ghurub-e-shafaq tak