kuchh is tarah se zamane pe chhana chahta hai

kuchh is tarah se zamane pe chhana chahta hai
wo aaftab pe pahre bithana chahta hai
talluqat ke dhage to kab ke tut chuke
magar ye dil hai ki phir aana jaana chahta hai
jo qatra qatra ikattha hua tha aankhon mein
wo khun ab meri palkon pe aana chahta hai
chatakh raha hai jo rah rah ke mere sine mein
wo mujh mein kaun hai jo tut jaana chahta hai
amir-e-shahr teri bandishen maaz-allah
faqir ab teri basti se jaana chahta hai
ye khwahishat ka panchhi ajib hai har rose
nai fazaen naya aab-o-dana chahta hai
udasi jhankne lagti hai us ki aankhon se
wo shakhs jab bhi kabhi muskurana chahta hai