sar-sar gesu hila rahi hai

sar-sar gesu hila rahi hai
sar par kale khila rahi hai
furqat mein khun rula rahi hai
taqdir ye rang la rahi hai
daghon se dil jala rahi hai
ulfat sikke bitha rahi hai
daman mein hai tere bu-e-kakul
kyun mujh ko saba uda rahi hai
haal-e-tap-e-hijr kuchh na puchho
dil kha chuki jaan kha rahi hai
jheli hui hai jafa tabiat
barson hi mubtala rahi hai
kisra mahal na taq-e-jam hai
ai dil kis ki sada rahi hai
marta hai dil buton ke upar
taqdir pahad dha rahi hai
tifli-o-jawani khub guzri
do din achchhi hawa rahi hai
udti hai khak us jagah par
barson jis ja faza rahi hai
ye bint-e-inab bahaar-e-gul mein
yaron ki bhi aashna rahi hai
lati nahin bu-e-yar nighat
us dil ki lagi bujha rahi hai
hum bhi the kabhi jawan raana
apni bhi kabhi hawa rahi hai
khulta nahin haal gul ka bulbul
shabnam pani chua rahi hai
ye fasl-e-bahaar be-khudi ka
rasta hum ko bata rahi hai
gulshan mein urus-e-gul ke upar
shabnam moti luta rahi hai
phule nahin gul chaman ke andar
wahshat aankhen dikha rahi hai
fiqre se le aae us sanam ko
kyun 'muntahi' baat kya rahi hai