shab ki bahaar subh ki nudrat na puchhiye

shab ki bahaar subh ki nudrat na puchhiye
kitna hasin hai khwab-e-mohabbat na puchhiye
phulon ki gham-rasida masarrat na puchhiye
zahir mein khanda-zan hain haqiqat na puchhiye
wo din gae ki thi mujhe pursish ki aarzu
mahbub ho ke ab meri haalat na puchhiye
hathon se dil ke chhut gaya daman-e-umid
kya mil gaya jawab shikayat na puchhiye
dil ko na hogi tab-e-gham-e-be-tawajjohi
lillah dastan-e-mohabbat na puchhiye
yun dekhte hain jaise udhar dekhte nahin
us lutf-e-be-gharaz ki nazakat na puchhiye