yaad karne ke zamane se bahut aage hain

yaad karne ke zamane se bahut aage hain
aaj hum apne thikane se bahut aage hain
koi aa ke hamein dhundega to kho jaega
hum nae gham mein purane se bahut aage hain
jism baqi hai magar jaan ko mitane wale
ruh mein zakhm nishane se bahut aage hain
is qadar khush hain ki hum khwab-e-faramoshi mein
jag jaane ke bahane se bahut aage hain
jo hamein pa ke bhi khone se bahut pichhe tha
hum use kho ke bhi pane se bahut aage hain