aaj dil se dua kare koi
haqq-e-ulfat ada kare koi

jis tarah dil mera tadapta hai
yun na tadpe khuda kare koi

jaan-o-dil hum ne kar diye qurban
wo na mane to kya kare koi

dil-e-betab ki tamanna hai
phir kahun main suna kare koi

mast nazron se khud mera saqi
phir pilaiye piya kare koi

mai-e-irfan ke hum bhi hain mushtaq
dar-e-mai-khana wa kare koi

shauq-e-didar dil mein hai 'darshan'
aa bhi jae khuda kare koi