aap ko zakhm-e-jigar dikhla ke hum chup-chap hain
aap ki aankhon mein aansu aa ke hum chup-chap hain

aaj duniya ki nigahen aasman par hain lagi
donon aalam par abhi tak chha ke hum chup-chap hain

aap ne to ek jahan mein hum ko ruswa kar diya
aap ki mahfil mein lekin aa ke hum chup-chap hain

log jalte hi rahe dil mein liye bughz-o-inad
shairana azmaten dikhla ke hum chup-chap hain

shikwa-e-jaur-e-butan 'sajjad' hum na kar sake
har-qadam par kitne dhoke kha ke hum chup-chap hain