ab kya bataun shahr ye kaisa laga mujhe
har shakhs apne khun ka pyasa laga mujhe

khafgi ho ya jafaen hon ya mehrbaniyan
har rang chashm-e-naz ka achchha laga mujhe

dekha jo ghaur se to wo jhonka hawa ka tha
tum khud hi chham se aai ho aisa laga mujhe

wo shakhs jis se pahle kabhi aashna na tha
nazdik se jo dekha to apna laga mujhe

yun bhi milegi manzil-e-jaanan yaqin na tha
wo samne the phir bhi ek sapna laga mujhe