abhi baadalon ka safar kahan mere mehrban
abhi qaid hun sar-e-ashiyan mere mehrban

rahe fasle meri dastaras mein tamam din
magar ab to sham ka hai saman mere mehrban

sabhi pursish-e-gham-e-jaan ke waste aae the
mere chaaragar mere nauha-khwan mere mehrban

wahi lafz hain durr-e-be-baha mere waste
jinhen chhu gai ho teri zaban mere mehrban

sabhi marhale rah-e-shauq ke the nigah mein
mere hausle rahe na-tawan mere mehrban

kabhi gardish-e-shab-o-roz se na aman mili
mere sar pe kab na tha aasman mere mehrban