abhi to hausla-e-karobar baqi hai
ye kam ki aamad-e-fasl-e-bahaar baqi hai

abhi to shahr ke khandaron mein jhankna hai mujhe
ye dekhna bhi to hai koi yar baqi hai

abhi to kanton bhare dasht ki karo baaten
abhi to jaib o gareban mein tar baqi hai

abhi to katna hai teshon se chattanon ko
abhi to marhala-e-kohsar baqi hai

abhi to jhelna hai sanglakh chashmon ko
abhi to silsila-e-ab-shaar baqi hai

abhi to dhundni hain rah mein kamin-gahen
abhi to marka-e-gir-o-dar baqi hai

abhi na saya-e-diwar ki talash karo
abhi to shiddat-e-nisfun-nahaar baqi hai

abhi to lena hai hum ko hisab-e-shahr-e-qital
abhi to khun-e-gulu ka shumar baqi hai

abhi yahan to shafaq-gun koi ufuq hi nahin
abhi tasadum-e-lail-o-nahaar baqi hai

ye hum ko chhod ke tanha kahan chale 'wamiq'
abhi to manzil-e-meraj-e-dar baqi hai