aise bimar ki dawa kya hai
jo batata nahin hua kya hai

kaun sunta hai is zamane mein
kis se kahiye ki iltija kya hai

lab-e-bimar thartharaate hain
jhuk ke suniye zara dua kya hai

mujh ko jo dekhta hai rota hai
koi kya jaane majra kya hai

hazrat-e-khizr bhi bata na sake
zindagani ka muddaa kya hai

dard par dusron ke hans dena
ye bhi achchha hai to bura kya hai

fakhr-e-khatun-e-hind hai 'ismat'
hum se puchhe koi wafa kya hai