ajab haalat hamari ho gai hai
ye duniya ab tumhaari ho gai hai

sukhan mera udasi hai sar-e-sham
jo khamoshi pe tari ho gai hai

bahut hi khush hai dil apne kiye par
zamane-bhar mein khwari ho gai hai

wo nazuk-lab hai ab jaane hi wala
meri aawaz bhaari ho gai hai

dil ab duniya pe lanat kar ki is ki
bahut khidmat-guzari ho gai hai

yaqin mazur hai ab aur guman bhi
badi be-roz-gari ho gai hai

wo ek baad-e-shumali-rang jo thi
shamim us ki sawari ho gai hai

mere pas aa ke khanjar bhonk de tu
bahut neza-guzari ho gai hai