baghal mein hum ne raat ek ghairat-e-mahtab dekha hai
tumhin is khwab ki tabir ho kya khwab dekha hai

tadap bijli ki bhi dekhi hai wo dil tham lete hain
teri be-tabiyon ko bhi dil-e-betab dekha hai

wo ulfat dost hon naseh dua hi dil se nikli hai
agar dushman ke ghar bhi majma-e-ahbab dekha hai

khuda ke samne ai mohtasib sach bolna hoga
mere saghar mein mai dekhi hai ya khun-nab dekha hai

'mubarak' iztirab-e-shauq ka aalam nahin chhupta
ki jab dekha hai hum ne aap ko betab dekha hai