banjar zamin pe chadar-e-sarsabz dal de dariya hun mujh ko jaanib-e-sahra uchhaal de tera hi nur un ke badan se ho jalwa-gar mere likhe huruf ko aisa jamal de utthen jo mere panw to dharti ho raqs mein ye kaenat raqs kare wo dhamal de hairat ki dhup se bhi na pighle wajud-e-barf rabb-e-kamal mujh ko hunar be-misal de mera qadam qadam ho zamanon mein mo'atabar mere nuqush-e-jism ko jah-o-jalal de bandha na ho kisi ne jise silk-e-sher mein meri zaban-e-fikr ko aisa khayal de kashkol tere samne 'faez' ne rakh diya rahmat-ba-dast sikke nigahon se dal de