bas ek jism ek hi qad mein pada rahun
behad hun main to kyun kisi had mein pada rahun

subh-e-azal hai kab se mere intizar mein
ji chahta hai taq-e-abad mein pada rahun

ek roz tang aa ke mujhe sochna pada
kab tak main apni sohbat-e-bad mein pada rahun

aage nikalta jata hun main apne-ap se
ab dar-guzar karun ki hasad mein pada rahun

be-sud ho gaya hun to hasil kahan gaya
ai asal zar main kaun si mad mein pada rahun