bithai jaengi parde mein bibayan kab tak
bane rahoge tum is mulk mein miyan kab tak

haram-sara ki hifazat ko tegh hi na rahi
to kaam dengi ye chilman ki tiliyan kab tak

miyan se bibi hain parda hai un ko farz magar
miyan ka ilm hi uttha to phir miyan kab tak

tabiaton ka numu hai hawa-e-maghrib mein
ye ghairaten ye hararat ye garmiyan kab tak

awam bandh len dohar to third wantar mein
second-o-first ki hon band khidkiyan kab tak

jo munh dikhai ki rasmon pe hai musir iblis
chhupengi hazrat-e-hawwa ki betiyan kab tak

janab hazrat-e-'akbar' hain hami-e-parda
magar wo kab tak aur un ki rubaiyan kab tak