chand bhi bujha dala dil dukhane walon ne
kuchh utha nahin rakkha dil dukhane walon ne

hum ne khastagi pai dil-giraftagi pai
khair hum se kya paya dil dukhane walon ne

khub waza-dari hai zakhm-e-taza se pahle
hum se haal-e-dil puchha dil dukhane walon ne

be-qarar hain aankhen kaise ab lahu roen
khushk kar diya dariya dil dukhane walon ne

sach kaha sada dil ko dil se rah hoti hai
khub hum ko pahchana dil dukhane walon ne

un ki wajh-e-shohrat to talkh guftugu hi thi
kyun badal liya lahja dil dukhane walon ne