dard ki raat ne ye rang bhi dikhlae hain
meri palkon pe sitare se utar aae hain

dil ke virane mein kis yaad ka jhonka guzra
kis ne is ret mein ye phul se mahkae hain

hum ne socha teri aankhen to uthen lab to hilen
is liye hum teri mahfil se chale aae hain

jin se insan ke zakhmon ka mudawa na hua
aaj wo chand sitaron ki khabar lae hain

chand sikkon ki talab hasrat-e-beja to na thi
phir bhi hum phaile hue hath se ghabrae hain