dasht ki aawargi ho chaak-damani bhi ho
ishq hai dil mein to wahshat ki farawani bhi ho

rahat-e-qalb-o-nazar tum ho tashaffi bhi tumhi
aur tum mere liye wajh-e-pareshani bhi ho

sukhi aankhon se taka karte hain su-e-asman
girya karne ko hamari aankhon mein pani bhi ho

kam se kam ye phone hi ka silsila baqi rahe
hijr mushkil hai magar kuchh is mein aasani bhi ho

kaisi kaisi khwahishen is dil mein pati hain wajud
ho angethi tum bhi ho aur raat barfani bhi ho

dil dua-go hai 'shakil-athar' ki is ki taba mein
hoshiyari hi nahin thodi si nadani bhi ho