dil jo murda ho to ye rashk-e-jinan kuchh bhi nahin
lala ho sabza ho ya aab-e-rawan kuchh bhi nahin

ye dahakte hue ghunche ye sulagte hue dil
har taraf soz-e-darun harf-e-zaban kuchh bhi nahin

pyare daman se juda ho gae main ne dekha
hasraten bolin miyan umr-e-rawan kuchh bhi nahin

lafz-o-mani mein jo rishta hai wo buniyaadi hai
sirf alfaz ka ek sail-e-rawan kuchh bhi nahin

karda-na-karda gunahon mein kati umr-e-aziz
log kahte hain ziyan warna ziyan kuchh bhi nahin

barish-e-sang ho shishe ki kamin-gahon se
kaise farzane ho shishe ka makan kuchh bhi nahin

khwab se khwab mein ek umr giraftar raha
ab khala khwab ba-juz wahm-o-guman kuchh bhi nahin