dil mein har-chand aarzu thi bahut
kaam thoda tha guftugu thi bahut

sang-e-manzil ye chhedta hai mujhe
aa tujhe meri justuju thi bahut

ai hawas! dekh dagh dagh jigar
tu bhi mushtaq-e-rang-o-bu thi bahut

kaun hai jis se main nahin uljha
go meri taba sulh-ju thi bahut

badh gai tujh se mil ke tanhai
ruh juya-e-ham-subu thi bahut

ek teri hi nigah mein na jache
shahar mein warna aabru thi bahut