dil mila dil ka muddaa na mila

dil mila dil ka muddaa na mila
ji liye jine ka maza na mila
banda-e-zar to har qadam pe mile
ek bhi banda-e-khuda na mila
koi shikwa nahin mujhe un se
dil hi to hai mila mila na mila
bewafa ne bana diya ye haal
wo to kahiye ki ba-wafa na mila
kuchh mila ho to baith kar joden
kya mila hum ko aur kya na mila
ba-khuda kuchh bhi lutf jine mein
lazzat-e-dard ke siwa na mila
sai-e-nakaam ka sitam ye hai
nukta-chinon ko ek bahana mila
muzmahil ho gain salahiyaten
jab zamane se hausla na mila
ajnabi puchhte hain 'jami' ko
ham-safiron se aasra na mila
Please share if you liked this!!!