dil nin pakdi hai yar ki surat
gul hua hai bahaar ki surat

koi gul-ru nahin tumhaari shakl
hum ne dekhin hazar ki surat

tujh gali bich ho gaya hai dil
dida-e-intizar ki surat

husn ka malak hum nin sair kiya
kahin dekhi na pyar ki surat

ab zamana sabhi tarah bigda
kya bane rozgar ki surat

wasl ke bich hijr ja hai bhul
jun nashe mein khumar ki surat

is zamane ki dosti ke tain
kuchh nahin e'tibar ki surat

kuchh thaharti nahin ki kya hogi
is dil-e-be-qarar ki surat

mubtazil aur kharab ho kar ke
apni launde nin khwar ki surat

'abru' dekh yar ka bro-dosh
dil hua hai kanar ki surat