dil talabgar-e-tamasha kyun tha
yani hasrat-kash-e-duniya kyun tha

din bahr-e-haal guzar hi jate
dil ka ehsan uthaya kyun tha

sakht begana tha lekin ya-rab
itna manus wo chehra kyun tha

juz ghazal khak tha daman mein mere
us ne phir pyar se dekha kyun tha

wo agar meri rasai mein na tha
aaine mein koi waisa kyun tha

aankh ko shauq ki dekhe us ko
dil ka pachhtawa ki dekha kyun tha

hasil-e-bazm hai parwane ki rakh
raat bhar shama ka charcha kyun tha

subh ke nam se ghabraata hun
ji ko ras aaya andhera kyun tha

sohbat-e-gul-badnan mein 'shohrat'
dil mein kanta sa khatakta kyun tha