ek bhi qatra na chhoda kijiye
dil mera jab bhi nichoda kijiye

aap hi ke nam se pahchan ho
nam mera sath joda kijiye

sidhe sidhe chal ke kya hasil hua
zindagi mudti hai moda kijiye

sirf duniya par hi sari tohmaten
khud ko bhi aakhir jhinjhoda kijiye

lene wale to sabhi kuchh le gae
aap bhi ehsan thoda kijiye

aap ko ye haq mohabbat mein diya
dil hai mera khub toda kijiye

main 'musafir' hun mujhe chalna hi hai
ba-adab chhaale na phoda kijiye