ek khwab musalsal tha ki khulta hi nahin tha
kya ped tha jis ka koi saya hi nahin tha

wo dard utha aaj ki dil baith raha hai
kashti hui tayyar to dariya hi nahin tha

mathe par shikan koi na ehsas-e-nadamt
wo katte saron ko kabhi ginta hi nahin tha

ab jaan pe ban aai to ehsas hua hai
jo dekh rahe the wo tamasha hi nahin tha

sadiyon ki wafaon pe musallat raha har dam
ek lamha-e-inkar jo guzra hi nahin tha