garche dil mein hi sada jaan-e-jahan rahte ho
par ba-zahir nahin malum kahan rahte ho

shukr-lillah ki abhi kaam tumhein baqi hai
le chuke dil to wale darpa-e-jaan rahte ho

aa nikalte ho kidhar bhul ke be-khwahish-e-dil
ab bhi jao wahin har roz jahan rahte ho

ai khush-abru koi phir dhab pe chadha taza shikar
yun jo har waqt liye tir-o-kaman rahte ho

gar kabhi aae 'asar' pas hue wohin udas
khush shab-o-roz pade auron ke han rahte ho