ghar ko ab dasht-e-karbala likkhun
aaj khud apna marsiya likkhun

sada kaghaz pe khun ke aansu
ab use khat mein aur kya likkhun

barg-e-gul par saba ke daman par
nam tera hi ja-ba-ja likkhun

zikr aae jo teri manzil ka
chand-suraj ko naqsh-e-pa likkhun

ho tera hi jamal pesh-e-nazar
jab qalam se khuda khuda likkhun

main to zinda hun mar chuka hai wo
apne qatil ka marsiya likhun

ai 'sarosh' apni zindagi ko main
kaun se jurm ki saza likkhun