hai taqaza-e-junun silsila-war mile
gham ki zanjir mile dard ki jhankar mile

tesha-e-nur liye subh ka paigham liye
koi bedar mile koi to hoshyar mile

dasht-e-wahshat ki qasam aabla-pai ki qasam
rah mein jab na koi saya-e-diwar mile

ham-safar hum ne jahan naqsh-e-tamanna paya
hum rah-e-zist ke is mod pe bekar mile

un ke chehron pe the ikhlas-o-mohabbat ke nuqush
dil mein jhanka to mere yar hi aghyar mile