hai wafa tujh mein to paband-e-wafa hun main bhi
mujh se mil baith mohabbat ki faza hun main bhi

jab bhi aa jae khayal un ko dil-e-muztar ka
lab pe be-sakhta aae wo dua hun main bhi

ham-safar ban ke mile ya bane rahbar apna
koi to puchhe ki manzil ka pata hun main bhi

gunj si ban ke fazaon mein jo ho jati hai gum
mujh ko lagta hai ki sahra ki sada hun main bhi

main ne chaha hai dil-o-jaan se 'sabiha' jis ko
wo kabhi aae kahe tujh pe fida hun main bhi