haqiqaten hon mayassar to khwab kyun dekhun
main tishnagi mein bhi samt-e-sarab kyun dekhun

tamam-umr guzarni hai jab andheron mein
to ek shab ke liye mahtab kyun dekhun

mere makan ke darwaze band rahne do
main apni aankh se mausam kharab kyun dekhun

waraq waraq tere dil ki kitab raushan ho
to chehra chehra naya intisab kyun dekhun

jo dubna hai to sail-e-azab mein dubun
fusun-e-mauj-o-tilism-e-habab kyun dekhun