har dam ki kashmakash se nikal rasta badal
ab aur un ke sath na chal rasta badal

ye khalfishaar-e-zehn ye khadshe ye hujjaten
in sab ka bas hai ek hi hal rasta badal

nakhwat-parast logon ko chhod un ke haal par
waqt un ke khud nikalega bal rasta badal

sochon mein jin ki taza hawa ka guzar nahin
kar denge tera zehn bhi shal rasta badal

ye teri zindagi hai guzar apne dhang se
sanche mein dusron ke na dhal rasta badal

tu jin ka ham-qadam hai ye be-mehr log hain
honge tere ye aaj na kal rasta badal

nuqsan degi tujh ko bahut gu-magu 'naim'
takhir kar na ek bhi pal rasta badal