har sawal ka apne khud jawab ho jae
zarre ki tamanna hai aaftab ho jae

tu kabhi jo bhule se be-naqab ho jae
muntaqil haqiqat mein apna khwab ho jae

ishq ke parastaro kuchh kami to hai warna
bul-hawas mohabbat mein kaamyab ho jae

ham-nafas khuda-hafiz ghuncha-o-anadil ka
baghban ki niyyat hi jab kharab ho jae

mai-kade mein tauba ka kis ko hosh rahta hai
aur har nazar teri jab sharab ho jae