is gham ko ikhtiyar nahin kar raha hun main
ye to nahin ki pyar nahin kar raha hun main

apni udasiyon ke nashe mein hun aaj-kal
shaghl-e-khum-o-khumar nahin kar raha hun main

kuchh der se hai rang-e-tamasha ruka hua
ek tir dil se par nahin kar raha hun main

ab dekhta hun rah mein duniya saji hoi
ab tera intizar nahin kar raha hun main

main aap apna dard jagata hun raat bhar
kuchh tum pe inhisar nahin kar raha hun main

le rakh tu apna harf-e-tasalli bhi pas rakh
ye koi karobar nahin kar raha hun main

main zist kar raha hun ye tum ko khabar nahin
tum par to jaan-nisar nahin kar raha hun main

hai dasht ye bhi hadd-e-tasawwur mein is liye
is dasht ko bhi par nahin kar raha hun main

kya raaz hai ki jis ko batane se peshtar
apna bhi e'tibar nahin kar raha hun main

yun to rahe ho tum bhi saf-e-dushmanan mein dost
lekin tumhein shumar nahin kar raha hun main