itna hai zindagi ka talluq khushi ke sath
ek ajnabi ho jaise kisi ajnabi ke sath

suraj ufuq tak aate hi gahna gaya yahan
kuchh tirgi bhi badhti rahi raushni ke sath

hukkaam ka suluk wahi hai awam se
ibn-e-ziyaad ka tha jo ibn-e-ali ke sath

allah re taghaful-e-chaara-garan-e-waqt
sunte hain dil ki baat magar be-dili ke sath

tabqon mein rang-o-nasl ke uljha ke rakh diya
ye zulm aadmi ne kiya aadmi ke sath