jaane kisi ne kya kaha tez hawa ke shor mein
mujh se suna nahin gaya tez hawa ke shor mein

main bhi tujhe na sun saka tu bhi mujhe na sun saka
tujh se hua mukalima tez hawa ke shor mein

kashtiyon wale be-khabar badhte rahe bhanwar ki samt
aur main chikhta raha tez hawa ke shor mein

meri zaban-e-atishin lau thi mere charagh ki
mera charagh chup na tha tez hawa ke shor mein

jaise kharosh-e-bahr mein shor-e-parind dub jae
dub gai meri sada tez hawa ke shor mein

nauhagaran-e-sham-e-gham tum ne suna nahin magar
kaisa ajib dard tha tez hawa ke shor mein

mere makan ki chhat pe the taer-e-shab dare dare
jaise payam-e-marg tha tez hawa ke shor mein

minnat-e-gosh-e-be-hisan kaun uthae ab 'salim'
nauha-e-gham mila diya tez hawa ke shor mein