jaane kyun ruh tan-badan mein nahin
aaj main apne pairahan mein nahin

chaar-din bhi wo chandni na rahi
aaj sae bhi anjuman mein nahin

ab sabhi ajnabi se lagte hain
aisa lagta hai main watan mein nahin

ab na aah-e-jigar mein soz raha
aur wo dard bhi ghutan mein nahin

gul-e-shahkar chhod de uljhan
ab mera zikr bhi chaman mein nahin

ab pahan lo bashir khamoshi
ab wo jadu tere sukhan mein nahin