jab aap se hi guzar gae hum
phir kis se kahen kidhar gae hum

kya kaba o dair o kya kharabaat
tu hi tha gharaz jidhar gae hum

aae the misal-e-shoala sargarm
jate hue jun sharar gae hum

shabnam ki tarah se us chaman se
hote hi dam-e-sahar gae hum

kuchh apne tain kiya na malum
kya aap se be-khabar gae hum

juz hasrat-e-umr-e-rafta afsos
kuchh aa ke yahan na kar gae hum

shaikhi se guzar hue qalandar
bigde the par ab sanwar gae hum

is darja hue kharab-e-ulfat
ji se apne utar gae hum

faiz us lab-e-iswi ka 'hatim'
bil-aks hua ki mar gae hum