jab tasawwur mein na paenge tumhein
phir kahan dhundne jaenge tumhein

tum ne diwana banaya mujh ko
log afsana banaenge tumhein

hasrato dekho ye virana-e-dil
is nae ghar mein basaenge tumhein

meri wahshat mere gham ke qisse
log kya kya na sunaenge tumhein

aah mein kitna asar hota hai
ye tamasha bhi dikhaenge tumhein

aaj kya baat kahi hai tum ne
phir kabhi yaad dilaenge tumhein

'saif' yun chhod chale ho mahfil
jaise wo yaad na aaenge tumhein