jab tera intizar hota hai
dil bahut be-qarar hota hai

dil pe chalta hai ikhtiyar un ka
jab ye be-ikhtiyar hota hai

ishq hota hai husn ka ham-sar
jab ye khud ikhtiyar hota hai

wo mujhe be-qarar karne ko
pahle khud be-qarar hota hai

hirs-e-shohrat nahin to rona kyun
nala bhi ishtihaar hota hai

dost kah kar na de fareb ai dost
dost par e'tibar hota hai

naznin hain kab aise log safi'
jin ka ehsan bar hota hai