khamushi mein hi la-jawab na tha
muskurahat ka bhi hisab na tha

main use harf harf padhta gaya
wo agarche khuli kitab na tha

ek muddat se so rahe hain log
phir bhi aankhon mein koi khwab na tha

jhil mein raat bhar tha kya raqsan
tera paikar to zer-e-ab na tha

marne walon ki thi jaza ki waid
jine walon ka ehtisab na tha

zarf ke imtihan mein ab ki bar
ek bhi shakhs kaamyab na tha

yun to behad sakhi tha dil ka 'amir'
wo magar sahab-e-nisab na tha